Lars: Gerði mistök fyrir Tékklandsleikinn

Lars Lagerbäck, landsliðsþjálfari í fótbolta, segir við Fréttablaðið í dag, að leikmenn hafi nálgast leikinn gegn Tékklandi í haust af of mikilli varkárni og segir að það sé að hluta til þjálfurunum að kenna.

„Þetta er ekki í fyrsta sinn sem það gerist hjá mér. Það gerðist í tapleiknum gegn Kýpur og þegar ég þjálfaði í Svíþjóð. Svo virðist sem eitthvað breytist í hugarfari leikmanna þegar vel gengur,“ segir Lagerbäck en Ísland vann fyrstu þrjá leiki sína í undankeppni EM 2016 samtals 8-0 áður en strákarnir töpuðu fyrir Tékklandi í Plzen, 2-1.

„Það vantaði grimmd í leikmenn. Þeir pössuðu sig of mikið á því að gera mistök og þegar það gerist þá dettur getustigið um nokkur prósentustig. Gegn jafn sterku liði og Tékklandi þurfa menn að þora og vera grimmir. Þetta er eitthvað sem við munum vinna í með leikmönnum og vonandi endurtekur þetta sig ekki,“ segir Lars Lagerbäck.