Hrútar fengu frábærar viðtökur í Cannes í gær

Ný íslensk mynd eftir Grím Hákonarson var frumsýnd í Cannes í dag. Myndin er hluti af keppnisflokknum Un Certain Regard sem er partur af aðalprógrammi hátíðarinnar. Það er mikill heiður fyrir Grím sem leikstjóra að myndin hans skuli valin í þessa keppni enda Cannes ein stærsta og virtasta hátíðin í heiminum. Umstangið í kringum frumsýninguna er því búið að vera gríðarlegt og starfsfólk hátiðarinnar verið með hann í stífu prógrammi.

Grímur ásamt Grímari Jónssyni framleiðanda og þeim Sigurði Sigurjónssyni og Theodór Júlíussyni voru mættir eldsnemma í myndatöku fyrir frumsýninguna í Höllinni, á annað hundrað ljósmyndarar voru mættir til að mynda þá bak og fyrir.

Salurinn var þétt setinn á tveimur hæðum og Isabella Rosellini sem er formaður dómnefndarinnar í ár var í salnum.

Eftirvæntingin eftir frumsýningunni var mikil. Stór hópur þeirra sem komu að vinnslu myndarinnar fylgdu henni eftir í Cannes og einnig var Ragnheiður Elín Árnadóttir Iðnaðar- og viðstkiptaráðherra mætt ásamt fulltrúum frá Kvikmyndamiðstöð Íslands, enda hefur þessi frumsýning gríðarlegt vægi fyrir íslenska kvikmyndagerð. 

Þarna eru Hrútar komnir í keppni með því besta sem er að gerast í heiminum í dag. Un Certain Regard flokkurinn er ætlaður upprennandi leikstjórum sem eru að gera sína fyrstu eða aðra mynd. Hrútar er önnur leikin mynd Gríms í fullri lengd en hann hefur einnig gert fjölda heimilda- og stuttmynda.

Stemningin í salnum var frábær og var myndinni gríðarlega vel tekið. Áhorfendur risu úr sætum og lófaklappið eftir sýninguna ætlaði aldrei að hætta. Þeir Grímur, Grímar, Siggi Sigurjóns, Theodór Júlíusson og Sturla Brandth Grrvlen kvikmyndatökumaður þurftu að hneigja sig margsinnis fyrir áhorfendum.

„Franska twitter logar,” sagði Grímar framleiðandi eftir að sýningunni lauk og hann hafði ekki undan að svara símtölum. 

Grímur og Grímar fór beint í hádegisverð eftir sýninguna með frönskum dreifingaraðilum og eftir það biðu blaðamenn í höllinni eftir að taka við þá viðtöl. Þessi frumsýning hefur gríðarlegt vægi varðandi sölu og dreifingu. „Það er strax byrjað að berjast um hana í nokkrum löndum,” sagði Grímar.

Sigurður Sigurjónsson og Theodór Júlíusson eiga báðir stórleik í myndinni en þeir leika bræður norður í Bárðadal sem talast ekki við. Einnig koma hrútar og kindur við sögu eins og titillinn gefur til kynna. Sögusviðið er því rammíslenskt og féll vel í kramið hér á frönsku rivíerunni.

„Ég hef aldrei komið áður til Cannes og það er mjög sérstakt að vera komin hér í þennan ævintýraheim kvikmyndanna,” sagði Siggi Sigurjóns leikari. „Það var stórkostleg upplifun að sjá myndina hér í fyrsta sinn. Það tók mig svona 10 mínútur að ná áttum en svo var það allt í lagi.” 

„Myndin kom mér á óvart, ég vissi svo sem hverju ég átti von á en hún er virkilega vel gerð, allir póstar komu vel út. Ég er virkilega ánægður með myndina. Næsta skref er svo að frumsýna heima, það verður líka gaman,” sagði Sigurður sem var svo rokinn á blaðamannfund með frönsku pressunni. Restin af deginum fór í viðtöl og að ræða við fjölmiðla.

Hrútar verður frumsýnd á Íslandi í lok mánaðarins.