Dana leyfir Conor að gera það sem hann vill

Dana White, forseti UFC, var eitt sinn ekki hrifinn af því að menn gætu átt heimsmeistarabeltið í tveim þyngdarflokkum. Conor McGregor hefur breytt þeirri skoðun hans.

Conor varð heimsmeistari í fjaðurvigt í desember og sagði þá að hann vildi einnig vera heimsmeistari í léttvigt. Sagði reyndar að sá þyngdarflokkur þyrfti sárlega á honum að halda. Það hefði enginn áhuga á flokknum. Næsti bardagi hans gæti því verið um léttvigtarbeltið.

„Conor segist vilja beltið í léttvigtinni, berjast fjórum sinnum á ári og verja bæði beltin. Ef einhver getur það þá er það Conor McGregor. Hann hefur gert allt sem hann hefur sagst ætla að gera. Ég er mjög áhugasamur,“ sagði White.

White hafði áður sagt að ef heimsmeistarar vildu keppa um belti í öðrum flokki þá yrðu þeir að gefa hitt beltið eftir.

„Þetta er annað mál því þessi gaur stendur alltaf við stóru orðin. Hann elskar að berjast og elskar líka peninga. Eins og ég segi, ef einhver getur gert þetta þá er það Conor.“