Frasakóngur íslenskra kvikmynda

Kvikmyndin Veggfóður var frumsýnd árið 1992. Fréttablaðið tók stöðuna á nokkrum af þeim sem fóru með hlutverk í myndinni. Sumir hafa haldið sig við leiklistina, á ólíkan máta þó, og aðrir fetað annan veg. Veggfóður verður sýnd í Bíói Paradís á morgun.

Hver man ekki eftir frösunum „Pís Of Keik“, „Tönnunum hans afa“ og „Passaðu þig á krókódílamanninum“ úr kvikmyndinni Veggfóður eftir Júlíus Kemp? 

Veggfóður var frumsýnd í Bíóborginni við Snorrabraut fyrir fullum sal gesta haustið 1992. 

Meðal þeirra sem fóru með hlutverk í myndinni voru þau Baltasar Kormákur, Steinn Ármann, Ari Matthíasson, Flosi Ólafsson heitinn, Dóra Takefusa og Ingibjörg Stefánsdóttir. Margt hefur drifið á daga aðstandenda myndarinnar síðan hún var frumsýnd fyrir um 24 árum. Margir hverjir héldu áfram á listasviðinu og aðrir héldu í allt aðrar áttir.

Á morgun mun költmyndaklúbburinn Svartir sunnudagar sýna Veggfóður klukkan 20.00.

„Okkur fannst vanta þessa tilteknu afþreyingarsneið í menningarlandslag borgarinnar. Síðan þá höfum við sýnt um það bil 100 kvikmyndir, margar þekktar, margar gleymdar en allar merkilegar. Ef eitthvað er íslenskt költ þá er það Veggfóður. Það kom varla annað til greina en Veggfóður. Hún ber helstu einkenni költmynda. Er rödd síns tíma, full af nekt og ofbeldi og fyrst og fremst ógleyman­legum frösum. Svo er myndin líka frábært tímahylki hvað varðar tónlistina,“ segir Hugleikur Dagsson, einn af stofnendum klúbbsins, spenntur fyrir kvöldinu.

Frá því að Svartir sunnudagar voru stofnaðir hefur hefðin verið sú að fá listamenn til að hanna ný plaköt fyrir sýningarnar og í þetta sinn fengu þeir félagar til liðs við sig tónlistar- og listakonuna Lóu Hjálmtýsdóttir.

„Lóa er algjör snillingur hún teiknaði sjálfan krókódílamanninn á veggspjald Veggfóðurs. Hver man ekki eftir frasanum „Passaðu þig á krókódílamanninum?“ spyr Hugleikur og skellir upp úr.