Jón Ásgeir efast um óhlutdrægni dómara vegna fréttaflutnings Fréttablaðsins

Jón Ásgeir Jóhannesson efast um að dómarinn Símon Sigvaldason sé óhlutdrægur í sinn garð vegna frétta Fréttablaðsins um fyrirtæki eiginkonu dómarans. Símon er dómari í Aurum-málinu þar sem Jón Ásgeir er einn hinna ákærðu.

Í bókun sem Gestur Jónsson, verjandi Jóns Ásgeirs, lagði fram við fyrirtöku málsins í dag segir að meðal annars efist hann um óhlutdrægni Símonar vegna fréttaflutnings Fréttablaðsins haustið 2014 af fyrirtækinu Rannsóknir og greining sem er í eigu Ingu Dóru Sigfúsdóttur, eiginkonu Símons. Fréttirnar snerust meðal annars um samning fyrirtækisins við menntamálaráðuneytið til að vinna að rannsóknum á högum ungs fólks en ekki var leitað útboðs vegna verkefnisins.

„Honum verið kennt um hluti sem hann telur sig ekki bera ábyrgð á“

Í bókuninni er skorað á dómstjóra Héraðdóms Reykjavíkur, Ingimund Einarsson, að draga skipun Símonar til baka. Auk fréttaflutnings er vísað í ummæli sem Símon hefur látið falla í fjölmiðlum en í bókun Gests segir meðal annars:

„Umræðan í samfélaginu í garð skjólstæðings míns hefur verið óvægin og honum verið kennt um hluti sem hann telur sig ekki bera ábyrgð á. Handvaldi dómarinn hefur opinberlega sagt að eðlilegt sé „...að dómarar endurspegli þjóðfélagsvitundina.“ Skjólstæðingur minn telur sig eiga rétt á dómi byggðum á birtum lögum en ekki óskilgreindri þjóðfélagsvitund þar sem handvaldi dómarinn situr.“

Þá er þess jafnframt getið í bókuninni að Símon, ásamt Ingimundi Einarssyni, dómstjóra, gerðu Gesti Jónssyni að greiða réttarfarssekt vegna Al Thani-málsins þar sem hann sagði sig frá málinu.

Fer fram á sérfróði meðdómarinn víki sæti

Í Aurum-málinu eru þeir Jón Ásgeir, Lárus Welding, Magnús Arnar Arngrímsson og Bjarni Jóhannesson ákærðir fyrir umboðssvik og hlutdeild í þeim vegna sex milljarða króna láns sem Glitnir veitti félaginu FS38 ehf., sem var í eigu Pálma Haraldssonar, vegna kaupa á félaginu Aurum Holdings Ltd.

Saksóknari í málinu, Ólafur Þór Hauksson, lagði fram kröfu við fyrirtökuna um að dómkvaddir matsmenn sem lögðu mat á verðmæti Aurum í einkamáli fái að bera vitni í málinu nú. Bókuð voru andmæli verjenda við þessari kröfu en málflutningur um hana fer fram í næstu viku.

Þá verður jafnframt málflutningur um kröfu Óttars Pálssonar, verjenda Lárusar, um að sérfróður meðdómari, Hrefna Sigríður Briem, víki sæti í málinu.

Það hefur vægast sagt staðið styr um dómarana í Aurum-málinu. Upphaflega var dæmt í málinu í júní 2014 þar sem sakborningarnir voru allir sýknaðir. Hæstiréttur ómerkti hins vegar þann dóm þar sem hann mat sérfróðan meðdómara í málinu vanhæfan. Í kjölfarið á ómerkingunni fór saksóknari fram á að dómsformaðurinn, Guðjón St. Marteinsson, myndi víkja sæti vegna vanhæfis og féllst Hæstiréttur á það.

Því þurfti að skipa nýjan dómsformann í málinu en það er Barbara Björnsdóttir. Dómstjóri skipaði síðan þau Símon og Hrefnu Sigríði í dóminn en einn hinna ákærðu, Bjarni Jóhannesson, mótmælti því að Arngrímur Ísberg færi úr dómnum fyrir Símon. Hann lagði fram kröfu þess efnis að dómsformaður myndi virða þá ákvörðun dómstjórans að vettugi en dómsformaðurinn hafnaði kröfunni. Sá úrskurður var kærður til Hæstaréttar sem vísaði kærunni frá.