Conor og Diaz mætast aftur á sama tíma og Aldo og Edgar berjast um beltið hans Conors

UFC staðfesti seint í gærkvöldi að aðalbardagi UFC 200-bardagakvöldsins 9. júlí verður önnur viðureign Conors Mcgregors og Nate Diaz, en sá síðarnefndi varð fyrsti maðurinn til að vinna írska vélbyssukjaftinn í UFC-bardaga á dögunum.

Enginn bardagi hefur skilað UFC jafn miklum tekjum í gegnum sjónvarpsáhorf og kemur því ekki mikið á óvart að þeir verði látnir berjast aftur á þessari afmælishátíð. Mikið var um dýrðir þegar UFC 100 var haldið.

Sjá einnig:Gunnar: Conor mun ekki tapa aftur fyrir Diaz

Conor varð heimsmeistari í fjaðurvigt í byrjun desember á síðasta ári þegar hann rotaði þáverandi heimsmeistara, Jose Aldo, eftir þrettán sekúndur.

Í staðinn fyrir að verja beltið gegn Frankie Edgar ákvað hann að fara upp um þyngdarflokk og berjast við Rafael dos Anjos um heimsmeistaratitilinn í léttvigt.

Dos Anjos meiddist skömmu fyrir bardagann og fór írski Íslandsvinurinn því upp um tvo þyngdarflokka sem varð honum um megn. Eftir að byrja frábærlega gegn Nate Diaz var hann laminn sundur og saman og á endanum afgreiddur með hengingartaki.

Sjá einnig:Diaz hrósar Conor: Mér finnst hann frábær

UFC ákvað þó að titilbardagi fari fram sama kvöld í þyngdarflokki Conors, fjaðurvigtinni. Jose Aldo, fyrrverandi heimsmeistari, mætir þar manninum sem átti að vera næstur í Conor, Frankie Edgar. Þeir munu berjast um bráðabirgða heimsmeistaratitilinn í fjaðurvigt og sigurvegarinn mætir svo Conor McGregor.

Það er vissulega svolítið skrítið að titilbardagi fari fram í þyngdarflokki Conors sama kvöld og hann berst upp fyrir sig en það sýnir svart á hvítu að Írinn er orðin lang stærsta stjarnan í íþróttinni og gerir meira og minna það sem hann vill.