Segir dauðsfallið hafa mikil áhrif á ákvörðunina

Það hefur varla farið framhjá nokkrum manni að Conor McGregor, heimsmeistari í fjaðurvigt í UFC, og vinsælasti bardagakappi heims um þessar mundir, er hættur. Það sagði hans að minnsta kosti á Twitter í gær.

Atburðarrásin hefur verið hröð og leikur MMA-heimurinn á reiðiskjálfi eftir tíðindin, en Conor átti að berjast aftur við Nate Diaz á UFC 200-bardagakvöldinu í Las Vegas í júlí.

Sjá einnig:Conor fær ekki að keppa á UFC 200

Ariel Helwani, MMA-blaðamaður á MMAfighting.com, ræddi tíðindi gærkvöldsins við ritstjóra síðunnar í myndbandi sem má sjá í spilaranum hér að ofan. Helwani er fremsti MMA-blaðamaður heims og sá allra virtasti en hann heldur úti vinsælu hlaðvarpi þar sem hann ræðir ítarlega við allar helstu stjörnunar.

„Eftir að ég talaði við mikið af fólki komst ég að því að þetta var ekki hrekkur eða eitthvað rugl. Conor var alvara var með þessu tísti,“ segir Helwani. „Ég fékk samt engin svör en það sem kom nokkuð oft upp var það sem ég talaði við Conor um fyrir skömmu og það er að það gæti verið illt á milli hans og UFC.“

Sjá einnig:Conor við íslenskan blaðamann: I'm retired, fuck interviews

„En gleymum því ekki að Conor fékk það sem hann vildi með því að berjast við Diaz aftur. Það sagði mér að hlutirnir væru í lagi,“ segir hann.

Helwani vill meina að dauðsfall Portúgalans Joao Carvalho hafi mikil áhrif á ákvörðun Conors, en Conor var við búrið þar sem samlandi hans Charlie Ward vann Portúgalann á Total Extreme-bardagakvöldi í Dyflinni fyrr í mánuðinum.

Carvalho lést af áverkum sem hann hlaut í bardaganum á sjúkrahúsi sama kvöld eftir að gangast undir heilaaðgerð. Conor og Ward eru báðir liðsmenn SBG Ireland bardagafélagsins sem John Kavanagh, þjálfari Conors og Gunnars Nelson, stýrir.

„Gleymum því ekki sem gerðist á Írlandi fyrir skömmu þar sem Conor sat við búrið þegar liðsfélagi hans, Charlie Ward, barðist við portúgalskan bardagakappa sem lést svo skömmu síðar,“ segir Helwani.

„Ég held að við getum ekki sópað þessu undir teppið. Miðað við þær samræður sem ég hef nú átt og þar sem ég þekki Conor ágætlega held ég, að fyrir hann að fara núna til Las Vegas og kynna bardaga eins og ekkert hafi í skorist sé erfitt fyrir Conor að gera.“

Sjá einnig:Conor silkislakur á Vegamótum í gærkvöldi

„Menn spyrja sig hvers vegna er ekki hægt að seinka þessum kynningartúr og gefa Conor smá andrými. Það er apríl og bardaginn er í júlí. Menn verða samt að skilja afstöðu UFC.“

„Conor var að upplifa skelfilegan hlut sem er beintengdur íþróttinni sem hann er andlitið fyrir. Á Írlandi eru öll blöð, sjónvarpsstöðvar og útvarpsstöðvar að tala um þetta dauðsfall. Þetta er risamál þar og er enn. Sérstaklega því þetta er beintengt Conor McGregor og liði hans SBG Ireland,“ segir Ariel Helwani.

Allt viðtalið þar sem Helwani reynir að greina þessa óvæntu ákvörðun Conors McGregors frekar má sjá í spilaranum hér að ofan.

Uppfært 10:48: Fyrr stóð í fréttinni að Charlie Ward hafi verið sá sem lést en það rétta er að Joao Carvalho lést eftir bardagann. Beðist er velvirðingar á mistökunum.