Þessu skipi er ætlað að finna olíulindir á Drekasvæðinu

Olíuleitarskip hélt frá Reykjavík í dag áleiðis á Drekasvæðið til að safna gögnum fyrir kanadíska félagið Ithaca. Þar með eru báðir sérleyfishóparnir komnir af stað í olíuleitina. 

Rannsóknarskipið birtist við Gróttu í morgun en til Íslands er það að koma úr níu mánaða leiðangri í Mexíkó-flóa. Skipið heitir Harrier Explorer og er í eigu norska félagsins Seabird Exploration.

Skipið lagðist ekki að bryggju heldur kom að sjöbaujunni utan við Engey og fór lóðsbátur til móts við það til að setja tollverði um borð. Einnig þurfti að koma varahlutum í skipið sem og norskum sérfræðingi en hann mun hafa eftirlit með því að bergmálsmælingarnar séu gerðar í samræmi við óskir kaupenda. 

Við hoppuðum einnig um borð og hittum leiðangursstjórann, Graham Boniwell. 

„Á skipinu eru tvær áhafnir. Það er tækniáhöfnin sem er vísinda- og könnunarhópurinn, og svo er það áhöfnin sem stjórnar skipinu fyrir okkur. Svo það eru tvær áhafnir um borð, um það bil 30 manns,” sagði leiðangursstjórinn í viðtali við Stöð 2. 

Þetta er annað rannsóknarskipið á átta mánuðum sem heldur á Drekasvæðið. Síðastliðið haust stóð sérleyfishópur undir forystu kínverska félagsins CNOOC fyrir fjögurra vikna leiðangri þangað. Harrier Explorer er ætlað að afla gagna fyrir hinn sérleyfishópinn, sem er undir forystu kanadíska félagsins Ithaca og þar með eru báðir hóparnir komnir af stað í olíuleitina.

Að Ísland verði olíuframleiðsluríki er eflaust fjarlæg hugsun hjá mörgum. Skip sem þetta er hins vegar ótvíræð vísbending um að þetta er raunverulegur möguleiki, sem er að færast nær. Þeir sem hætta mörghundruð milljónum króna af peningunum sínum í leiðangra á Drekasvæðið gera slíkt varla nema þeir telji vinningslíkurnar verulegar.

En hvernig metur leiðangursstjórinn á Harrier Explorer líkurnar á olíufundi á Drekasvæðinu? 

„Það er alltaf möguleiki en við erum bara fyrsti könnunarhópurinn. Við skráum bara gögnin, sendum þau í land og svo segja þeir sem túlka þau okkur hver árangurinn var. Svo það má segja að við tökum myndirnar, sendum þær í land til sérfræðinganna og þeir geta sagt okkur hvort þetta heppnaðist eða ekki,” svaraði Graham Boniwell. 

Áætlað er að leiðangurinn taki alls tvær til þrjár vikur. Frá Drekasvæðinu heldur skipið til Stafangurs í Noregi til verkefna í Norðursjó. 

Orkustofnun gaf út leyfi fyrir rannsókn Seabird Exploration þann 20. maí síðastliðinn. Leyfið má sjá hér.