Conor glímir við þjálfarann sinn

Conor McGregor æfir sig nú af kappi fyrir bardagann gegn Nate Diaz síðar í mánuðinum.

Þar er mikið undir hjá Íranum kjaftfora enda tapaði hann fyrir honum síðast og þarf að jafna sakirnar.

Conor flutti æfingabúðir sínar til Las Vegas í júlí og eru hlutirnir keyrðir áfram af krafti þessa dagana enda ætlar Írinn ekki að misstíga sig aftur.

Conor er duglegur að leyfa aðdáendum að fylgjast með undirbúningnum á netinu.

Í myndbandi sem hann birti nú um verslunarmannahelgina má sjá hann í gólfinu gegn þjálfaranum sínum, John Kavanagh. Gólfglíman varð Conor að falli síðast og hann hefur unnið markvisst í að bæta þann hluta síðustu vikur.

Myndbandið má sjá hér að ofan. UFC 202 fer fram 20. ágúst og verður í beinni á Stöð 2 Sport.