Sigmundur Davíð neitaði að tjá sig um fyrstu tölur

Framsóknarflokkurinn mælist með um 14 prósent í norðausturkjördæmi eftir fyrstu tölur. Um afar mikið tap er að ræða frá því í kosningunum árið 2013 þegar flokkurinn var ótvíræður sigurvegari í kjördæminu með tæplega 35 prósent atkvæða.

Sigmundur Davíð Gunnlaugsson er oddviti flokksins í kjördæminu líkt og árið 2013. Mikið hefur gengið á hjá forsætisráðherranum fyrrverandi undanfarin misseri en nú stefnir í að flokkurinn fái um 20 prósentum minna fylgi en árið 2013.

Fréttamaður Vísis, Sveinn Arnarson, er staddur á kosningavöku Framsóknar norðan heiða. Hann óskaði eftir viðbrögðum við fyrstu tölum ásamt öðrum fulltrúa fjölmiðla á staðnum en Sigmundur vildi ekki tjá sig um tölurnar.

Miðað við fyrstu tölur fær Framsókn einn mann í kjördæminu á þing, Sigmund Davíð.

Uppfært klukkan 23:35

Framsóknar hækkar í 15,2 prósent eftir aðrar tölur og er flokkurinn kominn með annan þingmann, Þórunni Egilsdóttur.

Fylgst er með gangi mála í alla nótt í Kosningavakt Vísis.

Að neðan má sjá tölur úr norðausturkjördæmi.