Ætlar að höfða mál gegn konunum

Donald Tump, forsetaframbjóðandi Repúblikana, ætlar að höfða mál gegn öllum þeim konum sem hafa sakað hann um kynferðisbrot eða óviðeigandi hegðun. Á kosningafundi í dag kallaði hann þær lygara og sakaði Demókrataflokkinn um að hafa skipulagt ásakanirnar.

Ræða Trump í dag átti að einblína á áætlun hans fyrir fyrstu hundrað dagana ef hann yrði forseti. Samkvæmt AP fréttaveitunni virtist Trump ekki ráða við sig og fór að tala um deiluefni sín við Hillary Clinton, mótframbjóðanda sinn, fjölmiðla og áðurnefndar konur.

„Allir þessir lygarar verða lögsóttir eftir kosningarnar. Ég hlakka svo mikið til þess,“ sagði Trump.

Tíu konur hafa stigið fram og sakað Trump um að káfa á sér og/eða kyssa. Þær gerðu það allar eftir að myndband frá árinu 2005 var birt í fjölmiðlum. Þar stærði Trump sig af því að kyssa konur og að hann gæti „gripið í píkurnar“ á þeim í skjóli frægðar sinnar.

Hann sagði að konurnar hefðu ekki lagt fram neinar sannanir og sagði tilganginn einungis hafa verið að skaða framboð sitt til embættis forseta.

Þá skammaðist Trump yfir því að fjölmiðlar hefðu gert konunum kleift að stíga fram án þess að skoða staðreyndirnar. Hann ítrekaði fyrri ummæli sín um að fjölmiðlar væru í einhvers konar baráttu gegn honum. 

Trump um konurnar og fjölmiðla.

Trump sagði að ef hann yrði forseti myndi hann stöðva kaupa AT&T á Time Warner, og þar af leiðandi CNN, og jafnvel skoða það að slíta í sundur Comcast og NBC Universal sem sameinuðust árið 2013.

Þrátt fyrir fjölmörg ummæli um árásir fjölmiðla gegn sér og að verið sé að svindla á honum hefur Trump ekki lagt fram neinar sannanir fyrir máli sínu samkvæmt Reuters fréttaveitunni.

Í ágúst sagði Forbes frá því að Donald Trump hefði ekki eytt einum dal í sjónvarpsauglýsingar á sama tíma og Hillary Clinton hafði eytt 52 milljónum. Þó hafði hann á þeim tímapunkti safnað 80 milljónum dala. Þau Gary Johnson og Jill Stein höfðu eytt 15 þúsund og 189 þúsund dölum.

Rannsóknir hafa margsinnis sýnt fram á það að Trump hafi fengið mun meiri umfjöllun en aðrir frambjóðendur í forsetakosningunum í Bandaríkjunum.

Í byrjun september hafði Trump eytt 28 milljónum og Clinton 133. Forval Repúblikanaflokksins og demókrata stóð yfir í fyrra og í byrjun árs. Þegar því var lokið áætlaði New York Times að Trump hefði fengið umfjöllun sem væri um tveggja milljarða dala virði. Um síðustu mánaðamót áætlað Reuters að upphæðin væri komin í 4,6 milljarða.

Fór yfir fyrstu hundrað dagana

Í ræðu sinni í Gettysburg í dag hét Trump því að hann myndi fjarlægja takmarkanir á innlendri orkuframleiðslu í Bandaríkjunum, fara í aðgerðir gegn Kína fyrir að hafa áhrif á gengi dollarsins og endursemja Fríverslunarsamning Norður-Ameríku. Þá sagðist hann einnig ætla að setja á bann við fjölgun opinberra starfsmanna og að í stað allra nýrra reglugerða yrði að afnema tvær gamlar.

Þá hét hann því að lágmarksrefsins ólöglegra innflytjenda sem hefðu áður verið fluttir úr landi yrði tveggja ára fangelsisvist.

Helstu sex atriði áætlunar Trump.