Ein besta skytta sögunnar lætur staðar numið

Ray Allen tilkynnti í dag að hann hefði lagt körfuboltaskóna á hilluna eftir langan og farsælan feril.

Allen, sem er 41 árs, hefur raunar ekki spilað neitt síðustu tvö tímabil en útilokaði þó aldrei endurkomu á völlinn. Nú er ljóst að hann hefur leikið sinn síðasta leik.

Allen er ein besta skytta allra tíma en enginn leikmaður í sögu NBA-deildarinnar hefur skorað fleiri þriggja stiga körfur en hann (2973).

Allen lék með fjórum liðum á 18 ára ferli í NBA. Fyrstu sjö árin í deildinni lék hann með Milwaukee Bucks en árið 2003 var honum skipt til Seattle SuperSonics.

Allen lék í fjögur ár með Seattle. Hann fór svo til Boston Celtics 2007 og hjálpaði liðinu að vinna meistaratitil á sínu fyrsta tímabili hjá því. Árið 2010 fór Boston aftur í lokaúrslit en tapaði fyrir Los Angeles Lakers í oddaleik.

Allen lék með Boston til 2012 þegar hann gekk í raðir Miami Heat. Allen varð meistari með Miami 2013 en hann skoraði fræga þriggja stiga körfu í sjötta leik lokaúrslitanna gegn San Antonio Spurs. Allen jafnaði þá metin og tryggði Miami framlengingu þar sem liðið knúði fram sigur og oddaleik í einvíginu.

Þriggja stiga körfuna frægu má sjá hér að ofan.

Allen skoraði 18,9 stig, tók 4,1 frákast og gaf 3,4 stoðsendingar að meðaltali í leik á ferlinum.