Stóra Kínamálið afgreitt á fyrsta liðsfundi: Stelpurnar sýndu sitt rétta andlit með svörum sínum

Stelpurnar okkar í íslenska kvennalandsliðinu í fótbolta hefja leik á hinu árlega Algarve-móti á morgun þegar þær mæta Noregi. Mótið er einn stærsti liðurinn í undirbúningi liðsins fyrir EM í Hollandi í sumar.

Eins og alltaf fær kvennalandsliðið flotta leiki á Algarve en að þessu sinni mætir liðið Noregi, Japan og Spáni í riðlakeppninni. Áherslurnar á leikskipulaginu eru oftast mismunandi frá ári til árs en þetta gífurlega sterka mót er notað til að móta liðið. Hvað er það sem landsliðsþjálfarinn, Freyr Alexandersson, vill sjá frá sínum leikmönnum á Algarve að þessu sinni?

„Það er ýmislegt sem við viljum fá fram núna. Það er þröngt spilað á fáum dögum og margir topp leikir. Við munum, eins og áður, rúlla á liðinu og ég mun setja leikmenn í mismunandi hlutverk.  Ekki endalega mismunandi leikstöður heldur fá leikmenn mismunandi ábyrgð,“ segir Freyr í samtali við íþróttadeild.

Freyr var kominn með ansi fastmótað byrjunarlið í undankeppni EM 2017 og virtist ekki greið leið inn í liðið fyrir stelpurnar sem sitja þar fyrir utan. Vegna meiðsla lykilmanna á borð við Dagnýju Brynjarsdóttur, Margrétar Láru og Hólmfríðar Magnúsdóttur eru nú nokkrar dyr opnar.

„Þarna eru þrjár stöður strax sem hægt er að berjast um. Auðvitað er Margrét á löppum og vonandi nær hún fullum styrk. Harpa átti barn fyrir sólahring síðan þannig hún gæti orðið klár. Hinar stelpurnar geta gripið gæsina. Þær fá tækifæri til þess. Það eru mörg teikn á lofti um að leikmenn ætli sér að grípa gæsina. Ég sé það alveg á æfingum og á leikjunum sem þær hafa verið að spila heima,“ segir landsliðsþjálfarinn.

Freyr fékk væna pillu frá fyrrverandi landsliðsþjálfaranum Sigurði Ragnari Eyjólfssyni rétt áður en hann hélt til Portúgal. Sigurður Ragnar, sem nú þjálfar í Kína, sagði í viðtali við Fréttatímann að Freyr hefði sama og bannað tveimur leikmönnum að ganga til liðs við sig í Kína og hann væri með fordóma gagnvart kínverskum fótbolta.

„Þetta fór ekkert lengra. Þessu var lokað á föstudaginn með þessari yfirlýsingu frá honum og svo mér. Þetta mál er úr sögunni. Ég ræddi þetta lauslega á fyrsta fundi við leikmenn og vildi vita hvort þær hefðu einhverjar frekari spurningar um málið.  Það voru engar spurningar og við vorum öll sammála um að eyða ekki frekari orku í þessa umræðu,“ segir Freyr.

Dagný Brynjarsdóttir og Hallbera Gísladóttir voru leikmennirnir sem Siggi Raggi vildi fá en báðar svöruðu þær honum fullum hálsi á Twitter.

„Mér fannst þær sýna sitt rétta andlit. Þetta kom mér ekki á óvart. Þetta eru miklir karkaterar og þær voru óánægðar með þau orð sem voru látin falla. Þær ákváðu að stíga fram og tjá sig og þær gerðu það líka snyrtilega fannst mér,“ segir Freyr Alexandersson.