Mayweather búinn að finna æfingafélaga fyrir bardagann við Conor

Þótt bardagi Floyds Mayweather og Conors McGregor hafi ekki enn verið staðfestur eru kapparnir byrjaðir að undirbúa sig fyrir hann.

Nú hafa borist fréttir af því að Mayweather sé búinn að finna sér æfingafélaga til að undirbúa sig undir bardagann við Conor.

Það er Bandaríkjamaðurinn Kevin Lee sem keppir í léttvigt í UFC. Hann hefur unnið átta af 10 bardögum sínum í UFC.

„Umboðsmenn Floyds höfðu samband við mig fyrir skemmstu og báðu mig um að taka þátt í æfingum. Ég er spenntur fyrir þessu og get notað aurinn sem ég fæ fyrir þetta,“ sagði hinn 24 ára gamli Lee sem hefur unnið fjóra bardaga í röð.