Kristinn lagði upp mark í sigri á nýliðunum | Myndband

Kristinn Steindórsson lagði upp fyrsta mark GIF Sundsvall í 3-1 sigri á Athletic Eskilstuna á heimavelli í 1. umferð sænsku úrvalsdeildarinnar í fótbolta í dag.

Kristinn var í byrjunarliði Sundsvall líkt og nafni hans Freyr Sigurðsson sem lék sinn fyrsta leik fyrir félagið.

Þetta var fyrsti leikur Eskilstuna í efstu deild og þeir komust yfir á 25. mínútu þegar fyrirgjöf Sasa Matic fór í stöngina og inn.

Aðeins sex mínútum síðar átti Kristinn frábæra fyrirgjöf á kollinn á Peter Wilson sem skallaði í markið.

Lars Krogh Gerson kom Sundsvall yfir fjórum mínútum fyrir hálfleik og Marcus Danielsson gulltryggði svo sigurinn þegar hann skoraði þriðja markið á 51. mínútu.

Fjórir Íslendingar komu við sögu þegar Norrköping vann 2-1 sigur á Hammarby.

Jón Guðni Fjóluson stóð vaktina í vörn Norrköping sem var 2-0 yfir í hálfleik. Alfons Sampsted sat allan tímann á bekknum hjá Norrköping.

Ögmundur Kristinsson stóð á milli stanganna hjá Hammarby og þeir Birkir Már Sævarsson og Arnór Smárason spiluðu einnig allan leikinn.

Þá var Haukur Heiðar Hauksson ekki í leikmannahópi AIK sem gerði markalaust jafntefli við Häcken.