Óskar eftir sérstökum umræðum um Vífilsstaði: "Enn og aftur finnst ráðherra þingið bara vera fyrir“

Sigurður Ingi Jóhannsson, formaður Framsóknarflokksins, hefur óskað eftir sérstakri umræðu á Alþingi, við fjármálaráðherra, um sölu ríkisins á landi Vífilsstaða til Garðabæjar. Þetta kemur fram á Facebook síðu Sigurðar.

Sigurður bendir á að núvirði lóðarinnar sé ívið meira, en kaupsamningur ríkisins við Garðabæjar hafi kveðið á um og vísar hann í 15 ára gamla frétt, máli sínu til stuðnings.

„Þá var verð á hektara fyrir rúmum 15 árum um 10 milljónir (núvirt 20 milljónir+).“

„Nú gera þeir Engeyjarfrændur samning við Garðabæinn sinn um sölu á ca 2,5 milljónir hektarann.“

Sigurður segir að það sé enn órætt í þinginu „hvort skynsamlegt væri að halda eftir lóð undir nýtt þjóðarsjúkrahús.“

„Enn og aftur finnst fjármálaráðherra þingið bara vera fyrir - en ekki sjálfsagður vettvangur fyrir skoðanaskipti og grundvöll ákvarðanatöku.“