Björn Bergmann setti boltann tvisvar framhjá Ingvari

Björn Bergmann Sigurðarson skoraði tvívegis þegar Molde gerði 3-3 jafntefli við Sandefjord á útivelli í norsku úrvalsdeildinni í fótbolta í dag.

Björn hefur því skorað þrjú deildarmörk á tímabilinu auk þess sem hann hefur gefið tvær stoðsendingar.

Óttar Magnús Karlsson sat allan tímann á varamannabekknum hjá Molde sem er í 5. sæti deildarinnar.

Ingvar Jónsson stóð í marki Sandefjord sem er í 10. sætinu.

Adam Örn Arnarson og Daníel Leó Grétarsson léku báðir allan leikinn fyrir Aalesund sem vann 3-1 sigur á Tromsö á heimavelli. Aron Elís Þrándarson er enn frá vegna meiðsla hjá Aalesund sem er í 7. sætinu.

Aron Sigurðarson lagði upp mark Tromsö sem hefur tapað þremur leikjum í röð.

Hjörtur Hermannsson stóð vaktina í vörn Bröndby sem gerði 1-1 jafntefli við SönderjyskE í dönsku úrvalsdeildinni í dag.

Hallgrímur Jónasson lék einnig allan leikinn fyrir Lyngby sem tapaði 3-0 fyrir FC Köbenhavn.