Hakkarar reyna að endurræsa WannaCry

Ítrekuðum og þungum netárásum hefur verið beint gegn vefsvæði sem átti stóran þátt í því að stöðva útbreiðslu WannaCry vírussins um síðustu helgi. Markmið þeirra hakkara sem standa að árásunum er í raun að endurræsa vírusinn. Hakkararnir notast við umfangsmikið net nettengdra heimilistækja, vefmyndavéla og jafnvel leikfanga, með vírus sem gengur undir nafninu Mirai. 

Atlögur sem þessar kallast Denial of Services Attack (DOS) eða Distributed Denial of Service Attack (DDOS) og eru gerðar með því að stýra umferð inn á vefsíður í því magni að þær taka ekki lengur við heimsóknum og liggi niðri.

Þegar WannaCry vírusinn hóf að herja tölvukerfi út um allan heim tóku sérfræðingar eftir því að eitt það fyrsta sem vírusinn gerði við sýkingu var að reyna að tengjast við skrítið lén.

Hinn 22 ára gamli Marcus Hutchins var meðal þeirra sem tók eftir þessu og skráði hann lénið sem fannst í kóða vírussins. Í ljós kom að WannaCry skoðar þetta lén til að kanna hvort hann sé undir eftirliti. Með því að virkja lénið tókst Hutchins að leggja vírusinn í nokkurs konar dvala.

Samkvæmt frétt Wired reyna hakkarar nú að segja þá síðu á hliðina svo WannaCry vírusinn geti haldið áfram að smitast á milli tölva.

Hutchins segir að árásirnar hafi hafist nánast samstundis og þær hafi orðið sífellt umfangsmeiri og þyngri. Hann starfar hjá netöryggisfyrirtæki og hafa þeir fengið aðstoð við að halda síðunni uppi.

Hins vegar hafa sést nýjar útgáfur af WannaCry vírusnum sem notast við annað lén en það sem Hutchins skráði. Aðrir sérfræðingar hafa skráð þau lén, sem einnig hafa orðið fyrir DDOS árásum.

Hutchins telur að hakkararnir sem eru að reyna að endurræsa WannaCry sé ekki þeir sömu og komu honum í dreifingu til að byrja með. Þessir séu eingöngu að reyna koma honum aftur af stað upp á gamanið.