Hoffenheim skellti Bayern á heimavelli annað árið í röð

Hoffenheim vann flottan 2-0 sigur á Bayern Munchen á heimavelli í lokaleik dagsins í þýska boltanum og varð um leið fyrsta liðið til að sigra þýsku meistaranna á þessu tímabili.

Er þetta í annað skiptið í röð sem Hoffenheim hefur betur gegn þýska stórveldinu en áður hafði Bayern unnið alla sautján leiki liðanna þar áður.

Mark Uth skoraði bæði mörk Hoffenheim í leiknum sitt hvoru megin við hálfleikinn en þrátt fyrir að vera 68% með boltann í leiknum og eiga 23 marktilraunir gegn 5 fundu gestirnir ekki leið framhjá markmanni Hoffenheim.

Hoffenheim komst upp fyrir Bæjara og upp að hlið Hannover og Dortmund á toppi deildarinnar með sigrinum en Bæjarar eru einu stigi eftir á.