Ástæða til að endurskoða bann við blóðgjöf homma

Óttarr Proppé heilbrigðisráðherra telur að ástæða sé til þess að endurskoða reglur sem banna samkynhneigðum karlmönnum að gefa blóð. Tryggja þurfi þó áfram öryggi blóðþega.

Þetta kemur fram í svari heilbrigðisráðherra við fyrirspurn Hildar Sverrisdóttir, þingmanns Sjálfstæðisflokksins.

„ Ráðherra þykir ástæða til að skoða þessar reglur, taka mið af því hvernig þær hafa þróast og hvernig breyttar og mildari reglur hafa reynst undanfarin ár í öðrum löndum,“ segir í svari Óttars.

Þar segir einnig að hann hyggist fela ráðgjafanefnd um fagleg málefni í blóðgjafaþjónustu að kanna hvort tímabært sé að breyta þeirri stefnu sem fylgt hefur verið.