Stjóri Arons fékk sparkið

Werder Bremen hefur rekið Alexander Nouri úr starfi knattspyrnustjóra eftir lélegt gengi það sem af er tímabili.

Nouri tók við Bremen fyrir rúmu ári og náði ágætis árangri með liðið á síðasta tímabili.

Í ár hefur hins vegar allt gengið á afturfótunum og Bremen situr í fallsæti og á enn eftir að vinna leik í þýsku úrvalsdeildinni. Bremen hefur aðeins skorað þrjú mörk, fæst allra liða í þýsku deildinni.

Aron Jóhannsson er á mála hjá Bremen en hefur verið sparlega notaður það sem af er tímabili og aðeins spilað þrjár mínútur með Bremen í þýsku deildinni.

Bremen tapaði 0-3 fyrir Augsburg í síðasta leiknum undir stjórn Nouris. Alfreð Finnbogason skoraði eitt marka Augsburg í leiknum.