Starfshópur mælir með nýjum innanlands- og alþjóðaflugvelli í Hvassahrauni

Starfshópur leggur til að nú þegar verði stofnað þróunarfélag um uppbyggingu á nýjum innanlands- og alþjóðaflugvelli í Hvassahrauni. Slíkur flugvöllur gæti þjónað alþjóðlegu tengiflugi sem og innanlandsflugi betur en flugvellirnir í Keflavík og Reykjavík geri og muni kosta á bilinu 140 til 200 milljarða króna fullbúinn.

Jón Gunnarsson fyrrverandi samgönguráðherra skipaði starfshóp í september í fyrra til að leiða viðræður samgönguyfirvalda, heilbrigðisyfirvalda, Reykjavíkur og annarra sveitarfélaga og hagsmunaaðila með það að markmiði að finna ásættanlega lausn á framtíð Reykjavíkurflugvallar að uppfylltum tilteknum skilyrðum.

Hópurinn hefur komist að þeirri niðurstöðu að fullkanna flugvallarskilyrði í Hvassahrauni svo fljótt sem verða megi áður en endanleg ákvörðun verði síðan tekin um að byggja nýjan fullkominn flugvöll þar.

Það tekur um tuttugu mínútur að keyra frá miðborg Reykjavíkur að Hvassahraunsafleggjaranum á Reykjanesbraut. En á undanförnum tveimur árum hefur Icelandair kannað aðflugs- og veðurskilyrði þar austan af sem flugvöllur myndi rísa. Þær kannanir hafa leitt í ljós að aðstæður í Hvassahrauni eru jafnvel betri en á Keflavíkurflugvelli og á Reykjavíkurflugvelli.

Starfshópurinn leggur til að stofnað verði þróunarfélag með aðild ríkisins, Reykjavíkurborgar og annarra hagsmunaaðila til að gera ítarlega fjárhags- og viðskiptaáætlun fyrir flugvöll í Hvassahrauni. Rekstrargrundvöllur Reykjavíkurflugvallar verði tryggður þar til nýr flugvöllur verði tekinn í gagnið. Í skýrslunni kemur fram að Icelandair telji hægt að ljúka fyrsta áfanga nýs fullkomins innanlands- og alþjóðaflugvallar á fimm árum, að loknu umhverfismati sem taki um tvö ár.

Dagur B. Eggertsson borgarstjóri sat í starfshópnum.

„Þetta eru tíðindi að fólk úr svona ólíkum áttum, Reykjavík, landsbyggðin, heilbrigðisráðuneytið og samgönguráðuneytið komist að sameiginlegri og afgerandi niðurstöðu,“ segir borgarstjóri. En auk Dags sátu Hreinn Loftsson, Linda Gunnarsdóttir, Róbert Guðfinnsson, Eyrún Ingibjörg Sigþórsdóttir og Sveinn Magnússon í starfshópnum.

Verði í blandaðri eigu hins opinbera og einkaaðila

Samkvæmt skýrslu hópsins telur Icelandair að nýr innanlands- og alþjóðaflugvöllur í Hvassahrauni myndi þjóna fluginu betur en Keflavíkurflugvöllur, ekki hvað síst tengifluginu. Fjármögnun flugvallarins ætti að vera auðveld í hlutafélagi í eigu ríkis, borgar og einkaaðila eins og flugfélaga.

„Núna eru tæknimenn og þeir sem þekkja best til í flugi búnir að fara yfir þetta. Þetta lítur vel út en hefur þó ekki verið full kannað að öllu leyti. Þannig að það skipti miklu máli að ná saman markvisst um næstu skref,“ segir Dagur.

Fyrrverandi samgönguráðherra og núverandi ríkisstjórn eigi heiður skilið að taka þetta mál upp úr skotgröfunum. Hann muni ræða málin við Sigurð Inga Jóhannsson samgönguráðherra á næstu dögum.

„Ég bind vonir við að það takist núna breið samstaða um að full kanna kost sem gæti verið góður fyrir innanlandsflug, fyrir millilandaflug og fyrir framtíð flugs sem stórrar atvinnugreinar á Íslandi,“ segir Dagur B. Eggertsson.