Reynir Pétur endurtekur leikinn í sumar

Þrátt fyrir að Reynir Pétur á Sólheimum í Grímsnesi verði 70 ára í haust þá hefur hann ákveðið að endurtaka leikinn og ganga hluta af hringveginum í sumar og heimsækja þá bæi og þorp sem hann heimsótti í Íslandsgöngunni sinni 1985.

Reynir Pétur varð heimsfrægur á Íslandi þegar hann gekk hringinn í kringum landið sumarið 1985 í þeim tilgangi að safna peningum fyrir byggingu íþróttahúss á Sólheimum. Alls staðar var Reynir Pétri fagnað. Nú ætlar hann að endurtaka leikinn í sumar með aðstoð Einars Mikaels, töframanns. Hluti af hringnum verður gengin, m.a. í um tuttugu bæjarfélög og þorp á hringleiðinni en ekið verður á milli lengstu leiðanna. Lagt verður af stað í hringferðina 20. ágúst.

„Þetta er bara sniðugt hugmynd því þá er ég að finna og sjá staði sem ég gekk á, það má segja að ég sé að finna sporin mín“,segir Reynir Pétur.

En heldur Reynir Pétur að fólk þekki hann á göngunni í sumar nú 33 árum eftir Íslandsgönguna 1985?

„Yngri kynslóðin hefur náttúrulega aldrei séð kallinn en það hafa kannski heyrt um kallinn“, segir Reynir Pétur hlægjandi.

Einar Mikael, töframaður verður sérlegur aðstoðarmaður Reynis Péturs í sumar.

„Hugmyndin er sú að við færum á staðina sem hann heimsótti á sínum tíma því ég held að það væri gaman fyrir hann og okkur öll að rifja upp þessa sögu með honum. Síðan verða settir upp allskonar viðburðir á þessum stöðum“, segir Einar Mikael.

Íþróttahúsið á Sólheimum þarfnast mikils viðhalds svo ekki sé minnst á sundlaugina sem hefur verið lokuð síðustu mánuði. Reynir Pétur stefnir á að safna peningum svo hægt verði að kippa þessum málum í liðinn. Hann segir skelfilegt að sundlaugin á staðnum sé ekki opin fyrir íbúa.