Fleiri og fleiri transbörn koma fram í sviðsljósið

„Það er ekki kúl, það er ekki val og það getur verið erfitt að vera transbarn“, segir Trausti Steinsson, kennari í Vallaskóla á Selfossi sem hefur kynnst nokkrum transbörnum og bætir því við að uppeldisaðferðir foreldra geta ekki valdið því að barn verði trans.

Það var full kennslustofan af áhugasömum kennurum sem mættu á skóladag Árborgar í vikunni sem haldin var á Stokkseyri. Inn í þessari stofu var Trausti að fjalla um transbörn en hann hefur á undanförnum árum kynnst nokkrum transbörnum, bæði í sínu starfi sem kennari og í hans nærumhverfi.

Trausti er nú búin að þýða bandaríska bók sem mun heita Transbarnið, handbók fyrir fjölskyldu og fagfólk, sem kemur út í haust. Transbarn er barn sem upplifir sig í öðrum líkama heldur en þeim sem það fæddist í. Trausti segist hafa komist að ýmsu varðandi transbörn.

„Meðal annars því að transbörn eiga auðvitað dálítið undir högg að sækja í samfélaginu og skólakerfinu, þess vegna vantar fróðleik og upplýsingar fyrir bæði foreldra og starfsfólk skóla. Mig langar að stuðla að því að fróðleikurinn komist til skila“, segir Trausti.

Í máli hans kemur fram að transbörnum er að fjölga á Íslandi.

„Já, meðal annars vegna þess að samfélagið er upplýstra, þau hafa alltaf verið til en hafa verið þögguð. Nú eru fleiri og fleiri að koma fram í sviðsljósið, það er það sem hefur breyst.

Trausti kom víða við í fyrirlestri sínum á Stokkseyri og las úr þýðingu sinni úr nýju bókinni þar sem þetta kom til dæmis fram.

„Það er ekki kúl að vera trans, það er ekki val og það getur verið erfitt og svo er til fordómafullt fólk víða í heiminum sem gengur í skrokk á transfólki eins og samkynhneigðu fólki sem leiðir stundum til dauða“.

Trausti segir að uppeldisaðferðir foreldra geta ekki valdið því að barn verður transbarn.

En getur fullorðið fólk orðið trans ?

„Já, þess eru dæmi, málið er að mjög margir vita þetta eða hafa sterkan grun að þeir séu trans, jafnvel í bernsku en þagga þessa kynvitund svo rækilega niður að viðkomandi kemur jafnvel ekki fram með þetta fyrr en á miðjum aldri, jafnvel um fimmtugt eða sextugt, þess eru dæmi“, segirTrausti.