17 ára fluttur á sjúkrahús vegna fíkniefnaneyslu

Lögreglan sinnti fjölmörgum verkefnum á höfuðborgarsvæðinu í gærkvöldi og í nótt. Á sjöunda tímanum í gærkvöldi barst lögreglu tilkynning um líkamsárás við Austurberg. Þar hafði maður verið laminn í höfuðið með áhaldi og fór gerandi af vettvangi. Í dagbók lögreglu kemur fram að vitað sé hver gerandinn er og að málið sé í rannsókn.

Á áttunda tímanum í gærkvöldi barst tilkynning um unga drengi sem voru sagðir skemma bifreiðar í Fossvogi með því að ganga og hoppa á þeim, að því er fram kemur í dagbók lögreglunnar.

Á tíunda tímanum í gærkvöldi var kona í annarlegu ástandi handtekin á hótelbar við Ármúla þar sem hún var hafði áreitt gesti. Var hún vistuð í fangageymslu lögreglu meðan ástand hennar lagast. Á ellefta tímanum í gærkvöldi var ungur maður handtekinn í Breiðholti þar sem hann var fastur í lyftu og búinn að skemma hana. Var hann vistaður í fangageymslu lögreglu meðan ástand hans lagast.

Rétt eftir klukkan ellefu barst tilkynning um eld við útidyrahurð kjallaraíbúðar í Hafnarfirði. Búið var ða slökkva eldinn þegar slökkvilið kom á vettvang. Eldurinn var í pappakössum við innganginn og eldsupptökin talin vera frá sígarettu.

Rétt fyrir miðnætti barst lögreglu tilkynning um sautján ára pilt í öndunarörðugleikum vegna fíkniefnaneyslu. Var maðurinn fluttur í sjúkrabíl til aðhlynningar á sjúkrahúsi. Lögreglan segir manninn hafa verið í fjölbýlishúsi í Breiðholti þar sem lögreglan hafði handtekið ungan mann í slæmu ástandi tæpri klukkustund áður.

Rétt fyrir klukkan eitt í nótt barst lögreglu tilkynning um eld í bifreið við Skarfagarða og var slökkvilið sent á vettvang.

Um svipað leyti var ölvaður maður handtekinn í Austurstræti grunaður um líkamsárás. Lögreglumenn horfðu á þegar maðurinn sló dyravörð í andlitið. Var hann vistaður í fangageymslu þar til hægt verður að ræða við hann.

Á fjórða tímanum í nótt var tilkynnt um umferðaróhapp við Huldubraut. Þar hafði bifreið verið ekið á grindverk og inn í garð. Fjórir menn voru á vettvangi en lögreglan handtók þá alla vegna gruns um akstur bifreiðar undir áhrifum áfengis og fíkniefna.