Leita að arftaka Ævars

„Þetta eru svo ótrúlega mikilvæg verðlaun,“ segir Anna Pálsdóttir verkefnastjóri Framúrskarandi ungra Íslendinga þetta árið.

Opnað hefur verið fyrir tilnefningar fyrir verðlaunin sem JCI hreyfingin á Íslandi veitir ár hvert. Verðlaununum er ætlað að hvetja og viðurkenna ungt fólk á aldrinum 18-40 ára sem eru að takast á við krefjandi verkefni og eru fyrirmyndir í samfélaginu. Öllum er frjálst að tilnefna hvern sem er, en rökstuðningurinn skiptir öllu máli.

„Við þekkjum öll þessa manneskju sem fer auka vegalengdina. Manneskjuna sem er annt um allt og alla, vill láta gott af sér leiða, er fyrirmynd, leggur hart að sér fyrir eitthvað sem hún veit að skiptir máli til langs tíma. Án þess þó nokkurn tímann að biðja um eitthvað í staðinn eða fá viðurkenningu fyrir. Þetta eru verðlaunin þar sem allir fá tækifæri til að tilnefna þessa manneskju svo hún fái hrósið og viðurkenninguna til þess að halda áfram sínu mikilvæga starfi,“ útskýrir Anna um tilgang verðlaunanna.

Ævar kominn í dómnefnd

5-7 manna dómnefnd sker svo úr um hvaða tíu einstaklingar þykja skara mest fram úr af öllum þeim sem tilnefndir eru. Einn hlýtur nafnbótina Framúrskarandi ungur Íslendingur 2018. 

Ævar Þór Benediktsson hlaut hana í fyrra fyrir störf sín á sviði menntamála. Hann mun nú sitja í dómnefnd ásamt Þórdísi Kolbrúnu R. Gylfadóttur ráðherra, Ólafi Nielsen framkvæmdarstjóra Kolibri, Melkorku Ólafsdóttur dagskrástjóra tónlistar í Hörpu og fleirum.

Tilnefnt er eftir 10 flokkum. Þeir eru:

1. Störf á sviði viðskipta, frumkvöðla og/eða hagfræði.

2. Störf á sviði stjórnmála, ríkismála eða lögfræði.

3. Leiðtogar/afrek á sviði menntamála.

4. Störf /afrek á sviði menningar.

5. Störf á sviði siðferðis og/eða umhverfismála.

6. Framlag til barna, heimsfriðar og/eða mannréttinda.

7. Störf á sviði mannúðar eða sjálfboðaliðamála.

8. Störf á sviði tækni og vísinda.

9. Einstaklingssigrar og/eða afrek.

10. Störf /uppgötvanir á sviði læknisfræði.

Hægt er að tilnefna til 1. maí á heimasíðu verðlaunanna hér.