Vonar að mengandi stóriðja heyri brátt sögunni til

Guðmundur Ingi Guðbrandsson umhverfisráðherra vonast til að tími mengandi stóriðju heyri brátt sagnfræði fortíðar. Þetta sagði Guðmundur í erindi sínu á ársfundi Umhverfisstofnunar þar sem hann sagði mikilvægt að læra af reynslu sem skapaðist af framkvæmd kísilversins United Silicon.

Sagði hann almennt mikilvægt að stíga varlega til jarðar, vanda allar ákvarðanir, eftirlit og eftirfylgni.

Hann sagði ríkisstjórnina horfa til langs tíma þegar kemur að loftslagsmálum í anda langtímastefnumótunar. Er vonast til að ná 40 prósenta samdrætti í losun gróðurhúsalofttegunda árið 2030 í takt við Evrópusambandið og kolefnishlutleysi árið 2040.

Guðmundur sagði ríkisstjórnina hafa samþykkt að leggja tólf milljónir króna til að vinna loftslagsstefnu og aðgerðaráætlun fyrir stjórnarráðið sjálft. Hluti fjármagnsins verður notaður í vinnu sérfræðings og hluti til beinan aðgerða til að draga úr og hefja kolefnisjöfnun á starfsemi stjórnarráðsins.

Sagðist Guðmundur leggja þar áherslu vistvæn innkaup og grænan ríkisrekstur sem hefur beina tengingu við grænt hagkerfi og markmið í loftslagsmálum.

Loftslagssjóður verður settur á laggirnar síðar á árinu í því skyni að styrkja nýsköpun og rannsóknir og er unnið að heildstæðri aðgerðaráætlun í loftslagsmálum í ráðuneytinu.

Hann sagði að á næstu árum verði tæpum sjö milljörðum varið til loftslagsmála.

Sagði Guðmundur úrgang vera fylgifisk neyslu þar sem skiptir máli að draga úr neyslu svo minnstur úrgangur falli til. Vill Guðmundur draga úr ofneyslu og sóun og nýta betur úrgang sem auðlind.

Hann sagði mikilvægt að sporna gegn plastmengun og vonaðist til að óþarfa notkun plasts muni heyra brátt sögunni til.

Náttúruvernd mun skipa stóran sess á þessu kjörtímabili að sögn Guðmundar en í stjórnarsáttmálanum er gert ráð fyrir að ráðist verð í átak í friðlýsingum og þjóðgarður stofnaður á miðhálendi Íslands. Hann sagði rannsóknir sýna að þjóðgarðar skili ekki bara miklum tekjum til þjóðarbúsins heldur einnig til hinna dreifðu byggða.