Ásmundur bað þingið velvirðingar

Ásmundur Einar Daðason, félags- og jafnréttismálaráðherra, bað þingheim afsökunar á að hafa veitt rangar upplýsingar þegar hann var spurður út í frumvarp um afnám skatta á styrki til lyfjakaupa bensínstyrki til þeirra sem eru verst staddir.

Guðmundur Ingi Kristinsson, þingmaður Flokks fólksins, lagði fram þetta frumvarp en hann spurði ráðherra í dag út í umsögn sem Tryggingastofnun hafði sent efnahags- og viðskiptanefnd um þetta frumvarp. Guðmundur vill meina að Tryggingastofnun haldi því fram að ef þessar bætur verða gerðar skattlausar muni þær hafa öfug áhrif fyrir þá sem þurfa á þeim að halda.

Guðmundur hafði áður beint fyrirspurn til Ásmundar um þetta frumvarp í apríl síðastliðnum en þá sagði Ásmundur að fundur hefði farið fram í velferðarráðuneytinu þar sem farið hefði verið yfir þessi mál og átti í framhaldinu að undirbúa það fyrir þingið.

Fundurinn dróst hins vegar og sagði Ásmundur á þinginu í dag að honum hefði ekki verið kunnugt um á sínum tíma að honum hafði verið frestað og fór því fram eftir að hann hafði svarað fyrirspurn Guðmundar í apríl síðastliðnum.

„Ég biðst velvirðingar á þessu gagnvart þinginu,“ sagði Ásmundur.

Ásmundur sagðist hins vegar hafa lagt áherslu á að þessu máli verði hraðað og að hann hefði ýtt á eftir því í síðustu viku en vissi ekki nákvæmlega hvar það er statt núna.

„Ég mun í framhaldi af þessari fyrirspurn þrýsta á þetta mál aftur innan ráðuneytisins vegna þess að það er mikilvægt að þarna sé gripið inn í. Það eru atriði þarna og menn hafa aðeins skiptar skoðanir með hvaða hætti þetta verður gert. Ég veit að það hefur verið til umræðu innan ráðuneytisins í góðu samráði við helstu hagsmunaaðila, að því er ég best veit.“