Stuðningur við ríkisstjórnina fer dvínandi

Sjálfstæðisflokkurinn er stærsti flokkur landsins samkvæmt nýrri könnun MMR og mælist með 23,7 prósenta fylgi. Fylgi flokksins dróst þó saman um tæpt prósentustig frá síðustu könnun MMR. Næst stærsti flokkurinn er Samfylkingin sem mælist með 14,6 prósenta fylgi. Píratar mælast með 14,1 prósent og bæta við sig rúmu prósentustigi.

Vinstri græn mælast með 12 prósent samanborið við 13,7 prósent í síðustu könnun, Framsókn mælist með 10,1 prósent en mældist síðast með 8,2 prósent. Miðflokkurinn mælist með 9,8 prósent fylgi samanborið við 10,3 prósent í síðustu könnun.

Þá mælist með Viðreisn með 7,1 prósenta fylgi en mældist síðast með 7,6 prósent. Flokkur fólksins mælist með 5,6 prósent og mældist síðast með 5,8 prósent. Aðrir flokkar mældust samanlagt með 3 prósenta fylgi.

Stuðningur við ríkisstjórnina dalaði milli mælinga en 49,8% sögðust styðja ríkisstjórnina nú samanborið við 52,8% í síðustu mælingu. Í lok janúar mældist ríkisstjórnin með 60,6 prósent stuðning og í desember var stuðningur við ríkisstjórnina 66,7 prósent.