Leikjahæsti Rússinn hættur með landsliðinu

Sergei Ignashevich hefur tilkynnt að hann sé hættur að leika með rússneska landsliðinu eftir að liðið féll úr leik á HM sem fram fer í heimalandi hans þessa dagana.

Ignashevich lék alla leiki Rússlands á HM en liðið féll úr leik í 8-liða úrslitum eftir tap gegn Króatíu í vítaspyrnukeppni.

Hinn 38 ára gamli Ignashevich er leikjahæsti landsliðsmaður Rússlands frá upphafi en hann hefur leikið 127 landsleiki fyrir þjóð sína. Oleg Blokhin átti leikjametið áður en Ignashevich eignaði sér það en Blokhin lék 112 landsleiki fyrir Sovétríkin.

Igor Akinfeev, landsliðsmarkvörður Rússa, á góðan möguleika á að eigna sér met Ignashevich þar sem þessi 32 ára gamli markvörður hefur leikið 111 landsleiki.