Elías Már skoraði þrennu í sigri

Elías Már Ómarsson skoraði þrennu í sigri Gautaborgar á Brommapojkarna í sænsku úrvalsdeildinni í fótbolta í dag.

Fyrsta mark Elíasar kom á 20. mínútu og var það eina sem skildi liðin að þegar flautað var til hálfleiks.

Gestirnir frá Brommapojkarna fengu víti snemma í seinni hálfleik en Erik Dahlin varði spyrnuna frá Markus Gustafsson og staðan því enn 1-0 fyrir heimamenn.

Elías Már gekk svo frá leiknum undir lokin þegar hann skoraði tvö mörk á 85. og 88. mínútu. Lokastaðan 3-0 fyrir Gautaborg.

Í vikunni bárust fréttir af því að Gautaborg hefði sett Elías á sölulista og gerði hann sitt í dag til þess að sanna sæti sitt í liðinu.