Ingvar Jónsson færir sig frá Noregi til Danmerkur

Ingvar Jónsson er genginn til liðs við danska B-deildarliðið Viborg frá norska úrvalsdeildarliðinu Sandefjord en tilkynnt var um þetta á heimasíðu norska félagsins í morgun.

Ingvar hefur verið í hlutverki varamarkvarðar hjá Sandefjord á yfirstandandi leiktíð og aðeins leikið einn leik á tímabilinu en liðið er langneðst í norsku úrvalsdeildinni með aðeins sjö stig eftir sautján umferðir.

Hann spilaði 56 leiki fyrir Sandefjord en hann hefur verið hjá félaginu síðan árið 2016 og hjálpaði liðinu upp úr B-deildinni á sínu fyrsta tímabili.

Viborg er án sigurs eftir tvær umferðir í dönsku B-deildinni en liðið hefur gert eitt jafntefli og tapað einum leik.

Ingvar lék með Njarðvík og Stjörnunni hér á landi áður en hann hélt í atvinnumennsku og hefur hingað til eingöngu leikið í Noregi erlendis, með Start, Sandnes Ulf og Sandefjord. Hann á 7 A-landsleiki að baki fyrir Íslands hönd.