Tók Arnór sautján mínútur að skora fyrir Lilleström

Arnór Smárason skoraði sitt fyrsta mark í sínum fyrsta leik er Lilleström gerði 2-2 jafntefli við Molde í norsku úrvalsdeildinni í kvöld.

Arnór gekk í raðir Lilleström frá Hammarby á dögunum en hann hafði fengið fá tækifæri hjá sænska liðinu eftir meiðsli.

Hann var ekki lengi að stimpla sig inn en eftir sautján mínútur skoraði Arnar sitt fyrsta mark og kom Lilleström 1-0 yfir. Fredrik Aursnes jafnaði metin á 38. mínútu.

Etzas Hussain virtist skora sigurmarkið fyrir Molde er hann kom þeim í 2-1 á 64. mínútu en þremur mínútum fyrir leikslok jafnaði Thomas Lehne Olsen metin og lokatölur 2-2.

Arnór Smárason spilaði fyrstu 82 mínúturnar en Gary Martin, fyrrum leikmaður KR og ÍA, kom inn í hans stað. Lilleström er í þrettánda sætinu en Molde í því fjórða.