Fyrrum UFC-meistari dæmdur í tveggja ára keppnisbann

Brasilíumaðurinn Fabricio Werdum er líklega búinn að berjast í síðasta sinn hjá UFC eftir að hafa fallið á lyfjaprófi og verið dæmdur í tveggja ára bann.

Sterar fundust í sýni Werdum sem tekið var í apríl. Werdum er orðinn 41 árs gamall og ólíklegt að hann snúi til baka þegar hann verður orðinn 43 ára.

Hann átti að berjast á bardagakvöldi í Moskvu um næstu helgi en af því verður augljóslega ekki. Nýsjálendingurinn Mark Hunt mun leysa hann af hólmi.

Bestu ár Werdum hjá UFC voru frá 2012 til 2015. Þá vann hann sex bardaga í röð og varð þungavigtarmeistari hjá bardagasambandinu.