Hafa ekki unnið leik síðan þeir tryggðu sig inn á HM

Íslenska karlalandsliðið hefur ekki unnið leik með sínu aðalliði síðan í október í fyrra eða á kvöldinu sem strákarnir okkar tryggðu sér sæti á HM í fyrsta sinn.

Einu sigurleikir íslenska landsliðsins á þessum 337 dögum voru tveir leikir á móti Indónesíu í janúar síðastliðnum. Leikirnir við Indónesíu voru ekki spilaðir á alþjóðlegum leikdegi og því voru okkar bestu leikmenn ekki í boði.

Íslenska karlalandsliðið tryggði sig inn á HM með 2-0 sigri á Kósóvó 9. október 2017. Það var þriðji sigur íslenska liðsins í röð í undankeppni HM og sjötti sigur liðsins í síðustu sjö landsleikjum.

Nú er aftur á móti öldin önnur og liðið þarf að vinna sig út úr miklu áfalli í síðasta leik.

7 af síðustu 10 landsleikjum aðalliðsins hafa tapast og besti árangurinn á þessum rétt tæpa ári eru jafntefli á móti Argentínu, Gana og Katar.

Íslenska liðið hefur fengið á sig 25 mörk í þessum 10 leikjum eða 2,5 mörk að meðaltali. Það hafa aðeins liðið 36 mínútur á milli marka mótherjanna en á meðan hefur íslenska liðið „aðeins“ skorað á 100 mínútna fresti.

Íslenska landsliðið á ennfremur í hættu að tapa fjórða leik sínum í röð á móti Belgíu í kvöld. Liðið tapaði tveimur síðustu leikjum sínum á HM í Rússlandi í sumar og svo fyrsta leik sínum í Þjóðadeildinni um helgina.

Síðustu 11 landsleikir á alþjóðlegum leikdögum:

8. september 2018: 0-6 tap fyrir Sviss

26. júní 2018: 1-2 tap fyrir Króatíu

22. júní 2018: 0-2 tap fyrir Nígeríu

16. júní 2018: 1-1 jafntefli við Argentínu

7. júní 2018: 2-2 jafntefli við Gana

2. júní 2018: 2-3 tap fyrir Noregi

27. mars 2018: 1-3 tap fyrir Perú

23. mars 2018: 0-3 tap fyrir Mexíkó

14. nóvember 2017: 1-1 jafntefli við Katar

8. nóvember 2017: 1-2 tap fyrir Tékklandi

9. október 2017: 2-0 sigur á Kósóvó

Síðustu 10 leikir íslenska karlalandsliðsins á alþjóðlegum leikdögum:

(Leikir frá síðasta sigurleik)

0 sigrar

3 jafntefli

7 töp

9 mörk skoruð

25 mörk fengin á sig

-16 í markatölu