Auglýsingabann bitni á innlendum framleiðendum

Núverandi fyrirkomulag áfengisauglýsinga endurspeglar ekki nútímann. Þetta sagði Þorgerður Katrín Gunnarsdóttir, formaður Viðreisnar, í fyrirspurn til Sigríðar Á. Andersen dómsmálaráðherra á Alþingi í gær. Þorgerður benti á að áfengisauglýsingar væru til að mynda áberandi í erlendum miðlum og á samfélagsmiðlum.

„Það þekkja það allir að vera úti í Eymundsson og standa við hliðina á bæði íslenska og erlenda Glamour. Áfengisauglýsingar eru leyfðar í erlenda Glamour en ekki íslenska.“ Hún benti á að auglýsingar væru leyfðar, með takmörkunum, í Svíþjóð, Finnlandi og Frakklandi og sagði núverandi fyrirkomulag bitna á innlendum framleiðendum.

Sigríður sagði tilefni til að endurskoða bannið. Þó ætti það að vera forgangsatriði að afnema einkarétt ríkisins á smásölu áfengis. Þannig væri hægt að koma til móts við áhyggjur innlendra framleiðenda vegna auglýsingabanns.