310 milljóna hagnaður Fiskisunds

Fjárfestingafélagið Fiskisund, sem er næststærsti eigandi Arnarlax með 8,4 prósenta hlut, hagnaðist um ríflega 310 milljónir króna á síðasta ári, að því er fram kemur í nýbirtum ársreikningi félagsins.

Fiskisund átti eignir upp á 1.975 milljónir króna í lok ársins og þá var eigið fé félagsins 1.726 milljónir króna. Víkjandi lán námu á sama tíma 249 milljónum króna.

Fiskisund er í jafnri eigu Einars Arnar Ólafssonar, stjórnarmanns í TM og Arnarlaxi, Höllu Sigrúnar Hjartardóttur, fyrrverandi stjórnarformanns Fjármálaeftirlitsins, og Kára Þórs Guðjónssonar fjárfestis. Félagið hagnaðist um rúmlega 1.400 milljónir króna árið 2016, einkum vegna sölu á laxeldisfyrirtæki þeirra, Fjarðalaxi, til Arnarlax.

Fiskisund seldi sem kunnugt er hlut sinn í Póstmiðstöðinni til Árvakurs og 365 miðla fyrr á þessu ári en fjárfestingafélagið fer enn með 35 prósenta hlut í Kexi Hosteli. – kij