Rauður dagur í Kauphöllinni

Hlutabréf í skráðum félögum í Kauphöll Íslands hafa lækkað töluvert eftir að viðskipti með bréf Icelandair voru stöðvuð klukkan 10:21 í morgun.

Raunar höfðu öll bréf nema bréf Icelandair lækkað í morgun þegar viðskipti voru stöðvuð en nú má sem dæmi taka bréf í Skeljungi sem hafa lækkað um 4,05 prósent það sem af er degi og bréf í Arion banka sem hafa lækkað um rúm þrjú prósent.

Engar upplýsingar hafa fengist um það hvers vegna viðskipti með bréf Icelandair voru stöðvuð, annað en að það hafi verið gert að beiðni Fjármálaeftirlitsins.

Vísir hefur sent FME fyrirspurn vegna málsins. Þá hefur Vísir jafnframt reynt að ná tali af Boga Nils Bogasyni, forstjóra Icelandair, í morgun en án árangurs.