Kosið í stjórn Haga í dag

Kosin verður ný stjórn í smásölurisanum Högum á hluthafafundi í dag. Samkvæmt heimildum Fréttablaðsins er nokkur kurr meðal smærri hluthafa Haga vegna þess hve lítið samráð við hluthafa tilnefningarnefnd félagsins hafði við vinnu sína, en hún lét duga að ráðfæra sig við þá sex stærstu. Niðurstaða tilnefningarnefndar er þó ekki bindandi og úrslitavaldið er í höndum hluthafa.

Meðal frambjóðenda er Jón Ásgeir Jóhannesson, fjárfestir og stofnandi Bónuss, en hann var meðal þeirra sem ekki hlutu náð fyrir augum tilnefningarnefndarinnar. Auk Jóns Ásgeirs eru ný í framboði þau Eiríkur Jóhannsson, forstjóri Slippsins á Akureyri, Kristján Óli Níels Sigmundsson bifreiðastjóri, Katrín Olga Jóhannesdóttir, formaður Viðskiptaráðs, og Sandra Hlíf Ocares lögfræðingur.

Búist er við góðri mætingu á fundinn og einboðið að nokkrir frambjóðenda taki til máls.