Tvær af sex leigubílastöðvum með sérmerkt stæði: „Mér finnst þetta óréttlátt“

Tvær af sex leigubílastöðvum eru með sérmerkt stæði í miðborg Reykjavíkur. Leigubílastjórar Taxi Service segja vegið að eðlilegri samkeppni og hafa ítrekað kvartað til Reykjavíkurborgar en segja fátt um svör.

Eins og staðan er í dag eru sex leigubílastöðvar eru með rekstur á höfuðborgar- og Suðurnesjasvæðinu. Tvær stærstu leigabílastöðvarnar eru með sérmerkt stæði í miðbæ Reykjavíkur en það er Hreyfill í Aðalstrætinu og BSR í Lækjargötunni.

Leigubílstjórar hjá Taxi service, sem eru þrjátíu og fjórir, sem og forráðamenn stöðvarinnar eru ekki sáttir og vilja að stæðin séu aðgengileg öllum leigubílstjórum.

„Eftir okkar bestu vitund þá er ekki borgað, það er ekki greitt fyrir afnot af þessum stæðum sem þessir tilteknu leigubílstjórar hafa og þetta er að okkar mati brot á samkeppni á leigubílamarkaði,“ segir Daníel Örn Sigurðsson, leigubílstjóri hjá Taxi Service.

Framkvæmdastjórn Taxi Service, fyrir hönd leigubílstjóranna, hefur ítrekað kvartað til Reykjavíkurborgar en það er borgin sem úthlutar stæðunum. Fyrsta kvörtunin var send fyrir um ári en fátt er um svör sögn Daníels og bílstjórarnir orðnir þreyttir á að bíða.

Allir leigubílstjórnar hafa aðgang að svokölluðu safnstæði á Hverfisgötunni. Bílstjórnarnir segja þetta kerfi bitna illa á þeim enda ekki með aðgang aðgengilegustu stæðunum í miðbænum. Það geti leitt til þess að þeir missi viðskiptavini.

„Þetta skerðir líka flæði, sérstaklega um helgar þegar það er mikið að gera og það safnast kannski 10-15 bílar í röð uppá Hverfisgötu og svo er kannski bara engin bíll á BSR stæðinu og við megum ekki leggja þar vegna þess að við höfum ekki rétt á því,“ segir Daníel.

Hér hljóti að vera vegið að eðlilegri samkeppni.

„Mér finnst þetta óréttlátt. Við viljum bara hafa jafna samkeppni og að jafnt skuli yfir alla ganga. Rétt skal bara vera rétt.“