Olíusjóður Norðmanna losar sig við hlutabréf í olíuiðnaði

Ríkisstjórn Noregs hefur lagt til að olíusjóður ríkisins, sem er sá stærsti í heiminum, selji verulegan hluta hlutabréfa sjóðsins í fyrirtækjum innan hins hefðbundna orkugeira. Hlutabréf í fyrirtækjum sem leita að olíu og jarðgasi verða seld en hlutabréf í rótgrónustu orkufyrirtækjunum verða ekki seld. Um er að ræða hlutabréf 134 fyrirtækja.

Gróft áætlað er sjóðurinn rúmlega 123 billjónir króna. (123.000.000.000.000)



Siv Jensen, fjármálaráðherra Noregs, segir markmiðið með þessari ákvörðun vera að draga úr þeirri áhættu sem fylgi lækkandi olíuverði.

Ákvörðunin var tilkynnt nú í morgun en samkvæmt Reuters leiddi hún strax til lækkunar á hlutabréfum fyrirtækja innan orkugeirans. Seðlabanki Noregs hafði lagt þetta til árið 2017. Olíusjóðurinn átti 2,45 prósent í Shell við lok síðasta árs. 2,31 prósent í BP. 0,99 prósent í Chevron og 094 prósent í ExxonMobil.



Í tilkynningu frá Fjármálaráðuneytinu segir að olíuvinnsla sé enn mikilvæg Noregi og verði það áfram um langt skeið.