832 mál afgreidd hjá Landsrétti síðan rétturinn tók til starfa

Réttarkerfið á Íslandi er svo gott sem á hliðinni að sögn dósents við lagadeild Háskólans í Reykjavík. Fráfarandi dómsmálaráðherra telur réttaróvissu þó ekki ríkja í landinu. Öllum málum í Landsrétti hefur verið frestað út vikuna og fangelsismálastofnun hafa borist beiðnir um frestun afplánunar.

Alls hafa 832 mál verið afgreidd í Landsrétti síðan dómurinn tók til starfa þann 1. janúar 2018. Unnið er að því að taka saman tölfræði yfir fjölda þeirra mála sem dómararnir fjórir, sem skipaðir voru dómarar við réttinn en hæfnisnefnd mat ekki meðal fimmtán hæfustu, dæmdu í eða afgreiddu með öðrum hætti. Líkt og fram hefur komi hefur öllum málum verið frestað í Landsrétti út þessa viku á meðan greining stendur yfir á dómi Mannréttindadómstóls Evrópu sem féll í gær. Sigríður Andersen kveðst ekki líta svo á að réttaróvissa sé í landinu.

Stjórnvöld hyggjast áfrýja dómnum til æðra dómsstigs Mannréttindadómstólsins. „Skilyrði fyrir því er að málin séu mjög óvenjuleg og það eru mjög fá mál tekin þar til skoðunar þannig að það má svo sem segja að meginreglan sé svona ráðandi í þessu en ég held alla veganna að flestir hér á landi líti svo á að málið sé óvenjulegt í þessum skilningi vegna þess að það er náttúrlega bara heilt réttarkerfi á hliðinni í rauninni,“ segir Eiríkur Elís Þorláksson, dósent við lagadeild Háskólans í Reykjavík.

Hann segir of snemmt að segja til um það nákvæmlega hvaða afleiðingar dómurinn hefur í för með sér. „Það má svo sem horfa á þetta í tvennu lagi, hvaða afleiðingar hafa þeir dómar sem hafa þegar fallið, þeir eru bara gildir í sjálfu sér, en aðilar geta hugsanlega leitað eftir endurupptöku,“ segir Eiríkur Elís.

Samkvæmt upplýsingum frá endurupptökunefnd hafa beiðnir ekki borist nefndinni síðan í gær en hún hyggst funda og fara yfir stöðuna. „Ég held að Landsréttur sé í sjálfu sér starfhæfur áfram. Hitt er annað mál að það er spurning með þessa fjóra dómara sem að þarna eru undir,“ segir Eiríkur.

 

Fangelsismálastofnun hafa borist beiðnir um frestun afplánunar vegna dóma sem þeir hlutu í Landsrétti. „Það eru nokkrir sem hafa óskað eftir fresti og við höfum veitt fresti eins og við gerum almennt í svona tilvikum,“ segir Páll Winkel fangelsismálastjóri.

Enginn sem þegar situr inni hefur þó óskað eftir að gera hlé á afplánun en á annan tug fanga sem nú afplána hlutu dóm í Landsrétti þar sem einhver dómaranna fjögra dæmdi í málinu. „Ég held að það sé mikilvægast að við vöndum til verka, allir haldi ró sinni og við vinnum bara einfaldlega í samræmi við íslensk lög,“ segir Páll.