Runólfur skipaður skrifstofustjóri

Runólfur Birgir Leifsson hefur verið skipaður skrifstofustjóri yfir skrifstofu hagmála og fjárlaga í heilbrigðisráðuneytinu til næstu fimm ára. Frá þessu er greint á vef Stjórnarráðsins þar sem því er bætt við að valið á Runólfi sé í samræmi við mat ráðgefandi nefndar sem skipuð var til að meta hæfni umsækjenda.

Það sé t.a.m. mat nefndarinnar að Runólfur hafi „verulega þekkingu og langa og fjölbreytta reynslu á sviði rekstrar.“ Þá hafi hann jafnframt gegnt „ábyrgðarmiklum stjórnunarstörfum og sé með góða þekkingu á opinberri stjórnsýslu.“

Runólfur Birgir er viðskiptafræðingur að mennt og lauk árið 2001 meistaragráðu í viðskiptafræði með áherslu á stjórnun og stefnumótun frá Háskóla Íslands og Viðskiptaháskólanum í Árósum.

Runólfur hefur gegnt ýmsum stjórnunarstörfum. Síðastliðin tíu ár hefur hann verið framkvæmdastjóri fjármálasviðs hjá Tryggingastofnun ríkisins. Áður vann hann hjá Reykjavíkurborg um árabil, fyrst sem forstöðumaður fjármálasviðs Fræðslumiðstöðvar og síðar sem fjármálastjóri menntasviðs.

Hann var framkvæmdastjóri Sinfóníuhljómsveitar Íslands í sjö ár, ritari fjárveitinganefndar Alþingis í eitt ár og á árunum 1981-1990 starfaði hann sem sérfræðingur og síðar deildarstjóri fjármála- og tölvudeildar í menntamálaráðuneytinu.