Kannabisúrgangur fannst við Vífilsstaðarhlíð

Mikið magn sorps fannst við Vífilsstaðarhlíð nálægt Heiðmörk í gær en vegfarandi rambaði á úrganginn. Lögreglan telur sorpið vera úrgang undan kannabisræktun og staðfesti Skúli Jónsson, aðstoðaryfirlögregluþjónn hjá höfuðborgarsvæðinu það. Mbl greindi fyrst frá þessu í morgun.

Skúli segir að ekki sé búið að bóka þetta hjá lögreglu eða tilkynnt en að lögreglumenn hafi farið á svæðið fyrr í dag og ruslapokarnir séu þar enn. Allt bendi til að þetta sé úrgangur úr kannabisræktun. Búið er að hafa samband við starfsmenn Garðabæjar og verið sé að fjarlægja úrganginn.

Ekki er hægt að rannsaka málið eins og staðan er nú vegna þess að ekki er vitað hver beri ábyrgð á sorpinu.

„Við vitum ekkert hvaðan þetta er eins og staðan er núna. Þetta er þarna ennþá og við gerðum ráðstafanir svo þetta verði fjarlægt en við vitum ekkert hver var að skila þessu þangað og það eru engar vísbendingar um hver hafi skilið þetta eftir. Vioð vitum ekki hver var að verki og þannig er bara rannsóknin eins og stendur.“

Skúli segir möguleika á frekari rannsókn komi einhverjar frekari vísbendingar um það hver beri ábyrgð á sorpinu.

Þetta sé ekki aðeins lögbrot vegna þess að kannabisræktun sé ólögleg heldur að einnig sé þetta brot á lögreglusamþykktum, þar sem ekki er leyfilegt að skilja eftir rusl og úrgang með þessum hætti.

„Við vorum nú ekkert að telja hvað þetta var úr mörgum pottum, við skoðuðum aðallega bara umfangið og þetta er dálítill haugur, einhverjir tíu pokar held ég en það er ekki verið að setja mikið af mold í hvern poka.“