Lögreglan var með mikinn viðbúnað vegna skothvells í Helgafelli

Lögregla var með talsverðan viðbúnað upp úr klukkan átján í gær eftir að tilkynnt hafði verið um skothvell í Helgafelli og var lögreglan með talsverðan viðbúnað sökum þess. Tæpum klukkutíma eftir að tilkynningin barst var maður stöðvaður og viðurkenndi hann að hafa verið að skjóta úr startbyssu upp í fjallinu í þeim tilgangi að venja hund sinn við skothvelli þar sem hann var að þjálfa hann sem veiðihund. Skýrsla tekinn af manninum og honum ráðlagt að finna sér aðrar og betri aðferðir og staðsetningar við að þjálfa hundinn sinn.

Þetta kemur fram í dagbók lögreglunnar á höfuðborgarsvæðinu þar sem farið er yfir helstu verkefni í gærkvöldi og í nótt.

Þá var kona handtekin í miðborg Reykjavíkur í gær eftir að hafa gert tilraun til að hnupla talsverðu magni af fatnaði úr verslun, var konan látin laus að skýrslutöku lokinni. Óskað var eftir aðstoð í verslun í Hafnarfirði þar sem maður hafði stolið vörum úr verslun. Var skýrsla tekin af manninum á staðnum og því loknu var hann látinn laus. 

Þrír menn voru handteknir í hverfi 101 í Reykjavík vegna húsbrots, þjófnaðar og vörslu fíkniefna. Voru þeir vistaðir í fangaklefa.

Lögreglan handtók karlmann í Fossvogi vegna líkamsárásar. Var maðurinn vistaður í fangaklefa en árásarþolinn hlaut minniháttar áverka.

Þurfti lögreglan að hafa afskipti af nokkrum í gærkvöldi og nótt sem voru til vandræða sökum ölvunar. Annar þeirra var til vandræða í hverfi 101 en hann var vistaður í fangaklefa þar til rennur af honum.

Hinn var til vandræða við hótel í miðborginni en honum var vísað á brott og gekk sína leið.

Fjögurra ára barn datt á hlaupahjóli í Kópavogi með þeim afleiðingum að það rotaðist. Var það flutt á sjúkrahús til aðhlynningar.