Greind með vefjagigt eftir sau­tján ára ó­vissu: „Loksins sinnt sem mann­eskju en ekki bara feitri stelpu“

Bríet Ósk Moritz hafði upplifað mikla verki í sautján ár þegar hún var loksins greind með vefjagigt, 27 ára gömul. Hún segir lækna hafa tengt verkina við yfirþyngd og hún hafi ekki fengið þá greiningu sem þurfti til fyrr en hún missti hátt í sextíu kíló.

Í færslu sem Bríet birtir á Facebook-síðu sinni segist hún hafa farið úr því að vera í yfirþyngd yfir í það að vera manneskja. Hún hafi verið tíu ára gömul þegar hún fékk fyrst að heyra frá læknum að ástæða verkjanna væri einfaldlega sú að hún væri of þung.

„Þegar ég var búin að missa þessi kíló var mér loksins sinnt sem manneskju en ekki bara feitri stelpu sem þurfti að létta sig,“ segir Bríet í samtali við Vísi. Í fyrsta sinn leituðu læknar að raunverulegri ástæðu verkjanna og hún látin fara í frekari rannsóknir.

Í ljós kom að Bríet þjáðist af alvarlegri vefjagigt og segir hún það hafa verið létti að fá loksins ástæðu verkjanna. Eftir þyngdartapið hafi verið erfitt að horfast í augu við það að verkirnir væru enn til staðar, og í raun mun verri en áður. Töfralausnin sem læknar höfðu talað um reyndist vera engin lausn á vandamálinu.

Samfélagslegt vandamál sem einskorðast ekki við heilbrigðiskerfið 

Bríet segir lækna oft hafa verið búna að greina hana áður en hún gat lýst verkjunum og ástandinu sem hafði verið viðvarandi í öll þessi ár. Þá segir hún viðmótið gagnvart fólki í yfirþyngd vera almennt neikvætt, hún hafi ekki aðeins fengið athugasemdir um holdafar sitt frá læknum heldur frá samfélaginu öllu.

„Yfirhöfuð er það þannig að það er allt annað viðmót. Fólk sem hefur misst svona mörg kíló upplifir það að því sé loksins tekið sem manneskju, það er eins og maður sé meira virði. Það er náttúrulega fáránlega sorglegt því maður er sama manneskjan,“ segir Bríet.

Hún segir þessi sautján ár af verkjum hafa verið erfiðan tíma og hún hafi í raun og veru þurft að fara í gegnum lífið „á hnefanum“. Verkirnir hömluðu henni í daglegu lífi og það hafi verið sérstaklega sárt að geta oft ekki leikið við dóttur sína vegna verkja, en hún og unnusti hennar, Þorri, eignuðust dótturina Dalrúnu Ingu árið 2017. 

Unnustinn verið klettur í gegnum ferlið

„Ég á honum ótrúlega mikið að þakka, hann þurfti að taka mikið á sig þegar ég gat lítið gert vegna verkja og stuðningurinn frá honum hefur verið ómetanlegur. Það hefur ekki verið auðvelt fyrir hann að lifa með svona verkjuðum einstakling,“ segir Bríet um unnusta sinn, sem hún segir hafa verið klettinn sinn í gegnum allt ferlið.

Bríet hefur verið í veikindaleyfi frá því í febrúar eftir að hún hneig niður sökum verkja í vinnu en hún starfar sem rafvirki í háspennuvirki Alcoa Fjarðaráls. Hún segir stuðninginn frá vinnustaðnum ómetanlegan en í raun hafi þau ákveðið að senda hana í veikindaleyfi þar sem hún var óvinnufær vegna verkja og á barmi taugaáfalls.

Hún sér loksins fram á bjartari tíma núna en í dag byrjar hún í fimm vikna endurhæfingu hjá Þraut, sem er miðstöð vefjagigtar og tengdra sjúkdóma. Hún hefur aðeins heyrt góða hluti um starfið sem unnið er þar og er bjartsýn á framhaldið, þrátt fyrir að það sé erfitt að vera frá eiginmanni og dóttur í fimm vikur á meðan endurhæfingu stendur.

„Ég hef fengið óteljandi skilaboð frá fólki, bæði vinum og fólki sem ég þekki ekkert, og það hefur hjálpað mikið. Það er mjög erfitt að vera í burtu frá fjölskyldunni svona lengi svo það er mjög dýrmætt að fá svona jákvæð viðbrögð.“

Hér að neðan má lesa færslu Bríetar í heild sinni.