Ölvaður og tekinn í þriðja skipti frá því að hann var sviptur ævi­langt

Lögregla á Suðurnesjum hafði um helgina afskipti af ökumanni sem var ölvaður undir stýri. Jafnframt kom í ljós að hann hafði áður verið sviptur ökuréttindum ævilangt og var þetta í það minnsta í þriðja skipti sem hann hafði verið stöðvaður frá því að hann var sviptur.

Í tilkynningu frá lögreglunni segir að annar ökumaður sem tekinn var fyrir hraðakstur hafi einnig verið undir áhrifum fíkniefna.

Þá segir að síðastliðinn föstudag hafi verið tilkynnt um innbrot í húsnæði í umdæmi lögreglunnar á Suðurnesjum. „Virðist sá eða þeir óboðnu gestir sem þar voru á ferð hafa komist inn um baðherbergisglugga. Húsráðandi hafði verið fjarverandi um nokkurra daga skeið en þegar hann kom heim sá hann ummerkin og sá að ýmislegt hafði verið tekið. Þar á meðal var áfengi, sígarettur, lyf og á þriðja tug þúsunda í reiðufé. Ekki er vitað hver eða hverjir voru þarna að verki,“ segir í tilkynningunni.