Brynjar Smári stýrir þjónustu­upp­lifun við­skipta­vina hjá Ís­lands­pósti

Brynjar Smári Rúnarsson hefur verið ráðinn í starf forstöðumanns Þjónustuupplifunar hjá Íslandspósti. Síðustu ár hefur hann starfað sem forstöðumaður markaðsdeildar Póstsins.

Í tilkynningu frá Íslandspósti segir að um sé að ræða nýja stöðu innan fyrirtækisins.

„Í starfinu mun hann nálgast öll verkefni út frá sjónarmiði viðskiptavina og tryggja að rödd þeirra heyrist inn í fyrirtækið við allar ákvarðanir. Hin nýja deild mun heyra beint undir forstjóra og Brynjar kemur inn í teymi lykilstjórnenda Póstsins.

Brynjar hefur undanfarin sex ár starfað sem forstöðumaður markaðsdeildar Póstsins og þar áður sem markaðssérfræðingur hjá fyrirtækinu. Hann er með meistaragráðu í markaðsfræði og alþjóðaviðskiptum frá Háskóla Íslands,“ segir í tilkynningunni.