„Erfitt að sætta sig við það hvernig fór“

„Ég er mjög sorgmædd yfir endalokum iglo+indi,“ segir Helga Ólafsdóttir eigandi og yfirhönnuður iglo+indi í einlægum pistli á Facebook síðu sinni. Eins og fjallað var um á Vísi í síðustu viku hefur Ígló ehf verið tekið til gjaldþrotaskipta og verslun iglo+indi verið lokað.

„Ferðalag iglo+indi hófst við eldhúsborðið heima hjá mér vikuna fyrir bankahrunið 2008. Allar götur síðan hefur allur minn kraftur farið í að hugsa um fyrirtækið, hvern einasta dag með alúð og einlægni, eins og litlu barni sem þarf að koma á legg. Þróunarferli á hverri einustu flík tekur um það bil eitt ár með tilheyrandi kostnaði og vinnu. Það þarf þol og metnað til að hanna og framleiða um 2500 mismunandi flíkur eins og við gerðum hjá iglo+indi.“

Helga segir að það sé mikil tilfinningaleg tenging og hugverkið henni mjög náið. Hún segir að rekstrarkerfið á Íslandi sé mjög erfitt fyrir fyrirtæki eins og hennar.

„Það er flókið fyrir lítil hönnunarfyrirtæki á Íslandi að lifa af. Rekstrarumhverfið er ekki bara sveiflukennt heldur er mjög dýrt að þróa, framleiða, markaðssetja og selja íslenska hönnun hérlendis og erlendis. Að hafa lifað af í þessu rekstrarumhverfi í ellefu ár er bara nokkuð gott ef miðað er við sambærileg fyrirtæki í þessum bransa. Það er samt engin huggun í því og að þurfa að kveðja á þennan hátt hefur verið ansi erfitt. Það er erfitt að sætta sig við það hvernig fór.“

 

Íslensk hönnun mikilvæg

Hönnuðurinn vonar að iglo+indi flíkurnar fari barna á milli og verði notaðar áfram. Með verslanir eins og Barnaloppan, þar sem foreldrar selja notuð barnaföt, eru góðar líkur á því að börn munu áfram sjást í flíkum frá merkinu næstu árin.

„Ég er þakklát og stolt af því að hafa fengið tækifæri til að vera frumkvöðull og byggja upp vörumerki á Íslandi í samstarfi við ótrúlega hugrakkt og hæfileikaríkt fólk. Fólki sem vann að því að koma iglo+indi í sölu í verslunum um allan heim, á tískupallanna á tískuvikunni í Flórens, í helstu tískutímaritin og svo lengi mætti telja. Þetta hefur verið lærdómsríkt ferðalag í 11 ár. Ég vona að iglo+indi muni lifa áfram á hugum fólks og að flíkurnar haldi áfram að fara barna á milli.“

Þó að ævintýri iglo+indi hafi endað svona hvetur Helga aðra hönnuði til þess að taka áhættuna. „Hvet ég alla Íslenska hönnuði til að láta draumanna sína rætast. Íslensk hönnun er mikilvæg - Never stop designing!!“