Óskað eftir vitnum að um­ferðar­ó­happi í Rjúpu­felli

Lögreglan á höfuðborgarsvæðinu óskar eftir vitnum að umferðaróhappi í Rjúpufelli í Reykjavík sem síðastliðið laugardagskvöld, þann 5. október. Málið barst lögreglu klukkan 22:27.

Ekið var á fjórar kyrrstæðar bifreiðar til móts við Rjúpufell 25-27 en tjónvaldurinn ók rakleiðis af vettvangi að því er fram kemur í tilkynningu frá lögreglu.

„Ökumaðurinn er hvattur til að gefa sig fram, en geti einhverjir veitt upplýsingar um hann eru hinir sömu vinsamlegast beðnir um að hafa samband við lögreglu í síma 444 1000.

Upplýsingum má einnig koma á framfæri með tölvupósti á netfangið sigrun.jonasdottir@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu. Meðfylgjandi er mynd frá vettvanginum í Rjúpufelli,“ segir í tilkynningu lögreglunnar.